كيف تقدم اقرار ٢٠٢٣ رغم وجود ثلاثة فترات طبقاً لتعديل منظومة الإقرارات ٢٠٢٣ ؟!
الجواب :
عزيزى الممول انت مطالب بتقديم فترة واحدة فقط ..
ولكن طبقا للفترة التى يقع فيها وقت ممارستك فيها نشاطك هل الفترة الأولي أو الثانية أو الثالثة .. ؟؟!
للتوضيح
تم تعديل المنظومة ( ثلاثة فترات ضريبية ) ودا بسبب التعديلات اللي تمت علي المادة ( 8 ) من قانون الضريبة علي الدخل رقم 91 لسنة 2005 كالأتي : .. وخصوصاً إبتداء من التعديلات الأتية
- التعديل بالقانون 26 لسنة 2020 حيث تم رفع الشريحة المعفاة من 8000 جنية الي 15000 جنية ورفع الإعفاء الشخصي السنوي للممول من 7000 جنية إلي 9000 جنية والعمل بالقانون اعتباراً من 08/05/2020 حتي 15/06/2023.
- التعديل بالقانون 30 لسنة 2023 حيث تم رفع الشريحة المعفاة من 15000 جنية إلي 21000 جنية ورفع الإعفاء الشخصي السنوي للممول من 9000 إلي 15000 جنية والعمل بالقانون اعتباراً من 16/06/2023 حتي 30/10/2023.
- التعديل بالقانون 175 لسنة 2023 حيث تم رفع الشريحة المعفاة من 21000 جنية إلي 30000 جنية والعمل بالقانون اعتباراً من 31/10/2023.
تعرف الفترة المناسبة لك اذاى ؟
بالنسبة للفترة اللي حضرتك مطالب بتقديم إقرارها .. بعض الأمثلة البسيطة اللي هتساعدك
المثال الأول :
حضرتك منشأة فردية و توقفت في الفترة من 1/1/2023 حتي 15/06/2023 ( بإختصار توقفت خلال الفترة دي ممكن تكون اتوقفت في شهر يناير أو فبراير أو مايو .. بإفتراض تاريخ توقفك النهائي في 01/06/2023 وطبعاً قدمت إخطار توقف للمأمورية علي نموذج 25 توقف نهائي في الحالة دي حضرتك مطالب بتقديم إقرار الفترة الأولي : حتي 15/6/2023 بمعني اصح الفترة اللي هاتقدمها وفقاً لقانون 26 لسنة 2020 يعني الشريحة المعفاة 15000 جنية.
المثال الثاني :
حضرتك منشأة فردية و توقفت في الفترة من 1/1/2023 حتي 30/10/2023 ( بإختصار توقفت خلال الفترة دي ممكن تكون اتوقفت في شهر يناير أو فبراير أو مايو أو أغسطس أو أكتوبر .. بإفتراض تاريخ توقفك النهائي في 20/10/2023 وطبعاً قدمت إخطار توقف للمأمورية علي نموذج 25 توقف نهائي في الحالة دي حضرتك مطالب بتقديم إقرار الفترة الثانية : حتي 30/10/2023 بمعني أصح الفترة اللي هاتقدمها وفقاً لقانون 30 لسنة 2023 يعني الشريحة المعفاة 21000 جنية.
المثال الثالث :
حضرتك منشأة فردية والنشاط مستمر ولم يتم التوقف وبالتالي عدم تقديم إي إخطارات توقف نهائي للمأمورية المختصة في الحالة دي حضرتك مطالب بتقديم إقرار الفترة الثالثة : حتي 31/12/2023 بمعني أصح الفترة اللي هاتقدمها وفقاً لقانون 175 لسنة 2023 يعني الشريحة المعفاة 30000 جنية وهايتم تقديم السنة كاملة.
بإختصار :
انت غير مطالب تقدم ثلاثة فترات .. كل ممول هايقدم اقرار واحد بفترة ضريبية واحدة
الخلاصة : علي الممول المزاول النشاط من 1/1 حتي 31/12/2023 هايقدم اقرار الفترة الثالثة فقط ، والممول اللي توقف خلال سنة 2023 هايشوف الفترة اللي اتوقف فيها سواء الاولي او الثانية وهايقدم اقرارها
